کیا آج کل بھی پردہ ضَروری ہے؟

kia aaj kal b pardah zaroori he

سُوال: کيا پردہ اِس دَور ميں بھی ضَروری ہے ؟

جواب: جی ہاں ۔
چند باتيں اگر پيشِ نظر رہيں توا ن شا ءَ اللہ عَزَّوَجَلَّ پردے کے مسائل سمجھنے ميں آسانی رہے گی۔
پارہ 22 سورۃُ الْاحزاب کی آیت نمبر33 میں پردے کا حکم دیتے ہو ئے پروردگا ر عَزَّوَجَلَّ کا ارشادِ نور بار ہے :

تَرجَمۂ کنزالايمان: اور اپنے گھروں ميں ٹھہری رہو اور بے پردہ نہ رہو جيسے اگلی جاہليَّت کی بے پردَگی۔
( پ ۲۲ اَلْاَحْزاب ۳۳)

خَلیفۂ اعلیٰ حضرت صَدرُالْاَفاضِل حضرتِ علامہ مولانا سَیِّد محمد نعيم الدّين مُراد آبادی عليہ رحمۃُ الھادی اسکے تَحت فرماتے ہيں:
اگلی جاہليَّت سے مُراد قبلِ اسلام کا زَمانہ ہے، اُس زَمانہ ميں عورَتيں اِتراتی نکلتی تھيں، اپنی زينت ومَحَاسِن (یعنی بناؤ سنگھار اور جسم کی خوبیاں مثَلاً سینے کے اُبھار وغيرہ) کا اظِہار کرتی تھيں کہ غيرمَرد ديکھيں ۔لباس ايسے پہنتی تھيں ،جن سے جسم کے اَعضاء اچھّی طرح نہ ڈھکيں۔
(خزائنُ العرفان ص ۶۷۳ )
افسوس! موجودہ دَور ميں بھی زمانۂ جاہِلیَّت والی بے پردَگی پائی جارہی ہے۔ یقینا جيسے اُس زمانہ میں پردہ ضَروری تھا وَيسا ہی اب بھی ہے ۔
-----------------
زَمانۂ جا ہِلیَّت کی مُدّت کتنی؟

مُفَسّرِشہیر حکیمُ الْاُمَّت حضر تِ مفتی احمد یار خان علیہ رحمۃ الحنّان فرماتے ہیں:
کاش اِس آیت سے موجودہ مسلِم عورَتیں عبرت پکڑیں۔
یہ عورَتیں اُن اُمَّہاتُ الْمؤمِنین رضی اللہ تعالیٰ عَنہُنّ سے بڑھ کر نہیں۔ صاحِبِ رُوحُ البیان علیہ رحمۃُ الحنّان نے فرمایا کہ
حضرتِ سیِّدُنا آدم عَلٰی نَبِیِّناوَعَلَیْہِ الصَّلٰوۃُ وَالسَّلام و طوفانِ سیِّدُنا نوح عَلٰی نَبِیِّناوَعَلَیْہِ الصَّلٰوۃُ وَالسَّلام کے درمیان کا زمانہ جاہِلیَّتِ اُولیٰ کہلاتا ہے جو بارہ سو بہتر (1272)سال ہے اور عیسیٰ علیہ السلام اور حضور صلَّی اللہ تعالیٰ علیہ واٰلہٖ وسلَّم کے درمِیان کا زمانہ جاہِلیَّتِ اُخریٰ ہے جو تقریباًچھ سو (600) برس ہے۔

واللہُ وَ رسولُہٗ اَعلَم عَزَّوَجَلَّ و صلَّی اللہ تعالیٰ علیہ واٰلہٖ وسلَّم

( نورُالعرفان ص ۶۷۳، روحُ البیان ج۷ص۱۷۰)